Чингэлтэй дүүргийн Хүүхдийн номын өргөөнд БНТУ-ын Ерөнхий сайдын дэргэдэх Туркийн хамтын ажиллагаа, зохицуулах агентлаг (ТИКА)-гаас тоног төхөөрөмж хүлээлгэн өгөх ёслолын арга хэмжээ 2015 оны 12 дугаар сарын 23-нд боллоо. Арга хэмжээнд дүүргийн Засаг дарга Д.Ганболд, Туркийн  хамтын  ажиллагаа, зохицуулах агентлаг /ТИКА/-ийн Улаанбаатар дахь Суурин төлөөлөгч, дэд профессор Экрэм Калан, дэд координатор Туран Жан, Засаг даргын Тамгын газрын дарга Ж.Эрдэнэбат болон хэлтсийн дарга нар, хүүхэд, багачуудын төлөөлөл оролцов.

Туркийн хамтын ажиллагаа, зохицуулах агентлагаас Хүүхдийн номын өргөөнд хөгжлийн бэрхшээлтэй хүүхдүүд үйлчлүүлэхэд зориулан 13 нэр төрлийн 43 тоног төхөөрөмж буюу нийт 80 сая орчим төгрөгийн буцалтгүй тусламж өгч байгаа юм.

Эдгээр тоног төхөөрөмж нь цахим хэлбэрээр хараа, сонсголын бэрхшээлтэй хүүхдүүд ном унших, түүнчлэн ном олшруулан, хувилах зэрэг олон төрлийн үйлчилгээ авах боломжийг бүрдүүлж байна.