Монгол Улсын шинэ Үндсэн хууль батлагдсан өдрийг угтан, дүүргийн Иргэдийн Төлөөлөгчдийн Хурлын нэрэмжит Чингэлтэй дүүргийн шатар сонирхогчдын аварга шалгаруулах тэмцээн болж өнгөрөв. Арваннэгдүгээр сарын 18-ны өдөр дүүргийн Ерөнхий боловсролын 50 дугаар сургуулийн Урлаг зааланд болсон тэмцээнийг Чингэлтэй дүүргийн Иргэдийн Төлөөлөгчдийн Хурлаас хоёр дахь удаагаа зохион байгуулж байгаа юм. Тэмцээнийг Иргэдийн Төлөөлөгчдийн Хурлын ажлын алба, дүүргийн Биеийн тамир спорт хороо хамтран зохион байгуулсан юм.

Нээлтийн ёслолд дүүргийн Иргэдийн Төлөөлөгчдийн Хурлын дарга Д.Бат-Эрдэнэ, Иргэдийн Төлөөлөгчдийн Хурлын ажлын албаны дарга Ц.Алтанцацрал, Зохион байгуулалтын хэлтсийн дарга Ж.Ганбат, Иргэний оролцооны хэлтсийн дарга Т.Уламбаяр нар оролцлоо.
Дүүргийн Иргэдийн Төлөөлөгчдийн Хурлын дарга Д.Бат-Эрдэнэ тэмцээнийг нээж хэлсэн үгэндээ, Чингэлтэй дүүрэг хот тохижилт, боловсрол, эрүүл мэнд, соёл урлаг, спорт гээд бүхий л салбарт ихээхэн бүтээн байгуулалт өрнүүлж буйг онцолсон юм.

Тэрээр “Хэдийгээр эдийн засаг хүндхэн байгаа ч 15 дугаар хороонд БНХАУ-ын Энхтайвны хөгжлийн сангийн хөрөнгөөр хүүхдийн амбулатори барьж ашиглалтад орууллаа. Дүүргийн 16, 12 дугаар хороон дээр сургууль цэцэрлэгийн цогцолбор барьж, жишиг өрхийн эмнэлэг байгуулж, гэр хорооллын олон шороон замуудыг хатуу хучилттай чулуун замаар холбох ажлын хүрээнд Чингэлтэй Хайлаастын хоорондох замыг хатуу хучилттай бөгөөд чулуун замаар холбож, 12, 13 дугаар хороог хооронд нь төв замаар холбож, 16 дугаар хорооны Хаан банкийг Дэнжийн мянгын эцэс Гахайн байрны чиглэл рүү холбох ажил үргэлжилж байгаа гээд олон ажил хийгдэж байна. Хамгийн гол нь эдгээр ажил, бүтээн байгуулалт бүгдийг Та бүхэн маань хамгаалж хайрлах үүргээ битгий мартаарай гэдгийг хэлмээр байна.

Мөн 2016 оны дүүргийн төсөв батлах хугацаа ойртож байна. Ирэх жилд иргэд та бүхэн рүүгээ чиглэсэн олон ажлыг хийж хэрэгжүүлэхээр төлөвлөж байна. Та бүхэн хорооныхоо Иргэний танхимын ажилтнаар дамжуулан, амьдарч буй хороо, дүүрэгтээ хийж хэрэгжүүлэх  шаардлагатай ажлуудын талаар саналаа өгөөрэй. Дүүргийн Засаг дарга Д.Ганболд бид хоёр чөлөөт цагаараа та бүгдийнхээ санаа бодлыг сонсох зорилгоор уралдаан тэмцээн зэрэг олон ажил өрнүүлж байгаа юм шүү” гээд шатрын тэмцээнд оролцож буй тамирчдад амжилт хүссэн юм.